சிறைச்சாலை கொலைகள் சரப்ஜித்சிங்கோடு ஒரு முடிவுக்கு வர வேண்டும். இது போன்ற சம்பவங்கள் நாகரிக சமுதாயம் வெட்கித் தலைகுனிய வேண்டிய காட்டுமிராண்டித்தனம்!

எஞ்சினியரிங் படித்தாலும், ‘ஒயிட் காலர்’ வாழ்க்கையைப் புறந்தள்ளிவிட்டு, மண்ணையும் மனிதனையும் வாழ வைக்க கீரை சாகுபடி செய்யும் அந்த நால்வர் குழுவுக்குப் பாராட்டுக்கள்.
- உமா மோகன்தாஸ், திண்டுக்கல்; மாரிமுத்து, ஈரோடு; எஸ்.வாசுதேவன், சென்னை; மு.செந்தாமரை, திருவிடை

தான் போலியோவால் பாதிக்கப்பட்டவர் என்பதையும் மீறி, கடலலையில் சிக்கித் தவிக்கும் மானிட இன்னுயிர்களைக் காப்பாற்றிவரும்
‘அந்தர மனிதர்’ தனபாலின் சமூக சேவை, விலைமதிப்பற்றது.

ஆர்யாவுக்கும் நயன்தாராவுக்கும் தேவாலயத்தில் கல்யாணம் நடந்தது என்று கிளப்பிவிட்டு பதற வச்சுட்டீங்களே சாமி! நயனின் சேவை இன்னும் கொஞ்ச காலம் தமிழ் சினிமாவுக்குத் தேவை.

‘சித்தார்த்-சமந்தா காதல் நிஜமா?’ என்ற தேச நலன் கருதிய அதிமுக்கிய கேள்வியை டைரக்ஷன் துறையில் ‘தீயா வேலை செய்யும்’ சுந்தர்சியிடம் கேட்டுள்ள உமது சேவை, மகத்தானது!

நம்ம ஊரில் ‘பட்லர் இங்கிலீஷ்’ பேசித் திரிபவர்கள், இனி ‘பட்டர் பிஸ்கட் தமிழ்’ பேசட்டும். டாக்டர் செம்மலின் பணி, செம்மொழிக்கு மேலும் ஒரு மகுடம் சூட்டட்டும்!

‘‘கொடுக்கிற ஆள் எல்லாம் எம்.ஜி.ஆர் என்று மக்களுக்கு ரிஜிஸ்டர் ஆகியிருக்கு. இதுதாங்க சினிமா’’ என்று சொன்ன ஆர்.சுந்தர்ராஜனின் பேட்டி, வார்த்தைக்கு வார்த்தை சிக்ஸர் மழை.

‘சாயி’ தொடரில் பாபாவின் புனித மொழிகள் உடலுக்கும், உள்ளத்துக்கும் உரம் சேர்க்கின்றன. அதனோடு, மயிலாப்பூர் சாயி திருக்கோயிலைப் பற்றி சுருக்கமாக வெளியிட்டிருந்தது சந்தோஷ சர்பிரைஸ்!

‘மனம் நினைத்தால் சாதாரணமான ஒரு ஸ்விட்சை அழுத்தும் வேலையைக் கூட சிரமமாக்கி விடும்’ என ‘வேலைக்குப் போகாதீர்கள்’ கட்டுரை கூறிய கருத்து சிந்திக்க வைத்தது!