‘வேலை செய்யாமல் சம்பளம்’ என்பதைப் படித்தபோது நம் நாட்டிலும் அது வேறு வடிவமாக - ‘நூறு நாள் வேலைத் திட்டம்’ என்ற பெயரில் நடைபெறுவதே நினைவுக்கு வந்தது. பலர் அதில் வேலை செய்யாமலும் பணிக்கே வராமலும் சம்பளம் பெறுவதாகக் கூறுகிறார்கள். விவசாயப் பணிகளுக்கு இதனால் வேலையாட்கள் கிடைப்பதில்லை. சிந்திக்கத் தூண்டிய கட்டுரை அது!

செக்யூரிட்டி வேலை செய்துகொண்டே, வாழ்க்கையில் செக்யூரிட்டி இல்லாத அடித்தட்டு மக்களைப் பற்றி எழுதும் ஸ்ரீதரகணேசனின் தமிழ்ப் பணி, சமுதாயப் பணியும் கூட!

குழந்தைகளே நடமாடும் கவிதைகள்தான்! அந்தக் குழந்தைகள் ‘க்ளிக்’கிய புகைப்படக் கவிதைகள் நெஞ்சைப் பிசைந்தன. அந்தத் தண்ணீர்க் குடமும் சிறுமியும் மனதில் கல்வெட்டாக நிற்கிறார்கள்!

‘அட... அக்கு பிரஷரில் குறட்டைக்குக் கூட சிகிச்சையா? அப்போ இனி குறட்டைக்கு ‘குட் பை’தான். இது தெரியாமல்தான் அயல்நாடுகளில் எத்தனை விவாகரத்துகள்!
‘மல்கோவா... பால்கோவா... ஐயம் ஃபிரம் கிரேட் கோவா...’ என்ற ‘தத்துவ’ முத்துக்களை உதிர்க்கும் பாடலுக்கு ஆடும் ஜரீன் கான் நிஜமாகவே புதிதாய் பொரிந்த பாப் கார்ன்தான். அதற்காக இப்படித்தான் ஏகத்துக்கும் ஜொள்ளு விடுவதா? (இது புகார் அல்ல... பொறாமை!)

‘யானைக்கும் அடி சறுக்கும்’ என்பதை நிரூபிக்கும் ஆப்பிள் ‘ஐபோன் 5’-ன் இமாலயத் தோல்வி, ஸ்டீவ் ஜாப்ஸ் இடத்தை யாராலும் நிரப்ப முடியவில்லை என்பதையே காட்டுகிறது!

டி.வி, பட்டிமன்றப் பேச்சாளர்கள் மற்றும் நிகழ்ச்சித் தொகுப்
பாளர்களை விடவும் கீழாக எழுத்தாளர்கள் மதிக்கப்பட்டால், எழுத்துக்கு என்ன மரியாதை? மனுஷ்ய புத்திரனின் ஆதங்கம் நியாயமானது!
என்னது? பத்தாவது படிச்சாலே மேனேஜர் வேலையா? எப்படியெல்லாம் புதுசு புதுசா புளுகுறாங்க! இத்தனை நகைச்சுவையாக இப்படியொரு விழிப்புணர்வு கட்டுரையைத் தரவே முடியாது. இதைப் படித்தாவது ஏமாறும் இளைஞர்கள் சுதாரிப்பார்களா?

சூர்யா, ‘மாற்றான்’ படத்தை எம்.ஜி.ஆர் ஃபார்முலா என்கிறார் என்றால்,  புரட்சித் தலைவரின் ஃபார்முலா, இந்த ‘ஃபார்முலா ஒன்’ காலத்திலும் முந்தும் என்ற ரகசியத்தை தெரிந்து வைத்திருக்கிறார் என்றுதானே அர்த்தம்!