‘‘நம்ம தலைவரை மீட் பண்ணிட்டு ஜோசியர் ஏன் கடுப்பா போறார்..?’’
‘‘புது வருஷத்துல ஜாமீன் வாங்க சிறந்த நாட்கள்.... வெளிநடப்பு செய்ய தகுந்த நாட்கள்... ஊழல் செய்ய உகந்த நாட்கள்... உண்ணாவிரதம் இருக்க ராசியான நாட்கள் இதையெல்லாம் குறிச்சுத் தரச் சொன்னாராம்!’’
- வீ.விஷ்ணுகுமார், கிருஷ்ணகிரி.

‘‘எதுக்குத்தான் விழா எடுக்கறதுன்னு இந்தக் கட்சிக்காரங்களுக்கு விவஸ்தையே இல்லை...’’
‘‘ஏன்... என்னாச்சு?’’
‘‘புதிய ஊழல் ஒன்றுக்கு துவக்க விழாவாம்..!’’
- எஸ்.ராமன், சென்னை-17.

‘‘கூட்டத்துல நிறைய பேரு பாதியில எழுந்து போறாங்களே... யாருய்யா அவங்கல்லாம்?’’
‘‘நம்ம கட்சியோட பார்ட் டைம் தொண்டர்கள், தலைவரே..!’’
- பெ.பாண்டியன், காரைக்குடி.

‘‘நர்ஸ்! ஆபரேஷன் தியேட்டருக்கு வெளியே என்ன கூட்டம்..?’’
‘‘பேஷன்ட் பிழைப்பாரா, இல்லையான்னு சூதாட்டம் நடக்குது டாக்டர்..!’’
- யுவகிருஷ்ணா, தூத்துக்குடி.

‘‘தலைவர் வீட்ல இருந்து கட்சி ஆபீஸ் எவ்வளவு தூரம்..?’’
‘‘அதிகமில்ல... கோர்ட்ல இருந்து ஜெயிலுக்குப் போகிற தூரம்தான்..!’’
- லெ.நா.சிவகுமார், சென்னை-33.

‘‘என்னது... அந்த நடிகை ஒரு பாட்டுக்கு டான்ஸ் ஆட ஐம்பது லட்ச ரூபாய் கேக்கறாங்க..?’’
‘‘ஒரே பாட்டுல பணக்காரர் ஆகணுமாம்...’’
- கே.ஆனந்தன், தர்மபுரி.

‘‘தலைவருக்கு டாக்டர் பட்டம் குடுத்தது தப்பாப் போச்சா... ஏன்?’’
‘‘உண்ணாவிரதப் போராட்டத்தைக்கூட ‘டயட் கன்ட்ரோல் இருக்கப் போறேன்’னு புரியாத மாதிரியே சொல்றாரே..!’’
- பர்வீன் யூனுஸ், சென்னை-44.